Edicions jorn :: literatura occitana contemporanea

De Robèrt Lafont, se coneis mai que pus l’obra, multipla e abondosa, de linguista, d’istorian de la literatura, de medievista, de sociològ e mai de teorician politic de l’occitanisme contemporanèu.

Se coneis tanben l’ample de son òbra de romancièr en occitan, dempuèi son primier raconte, La Vida de Joan Larsinhac, publicat a l’endeman de la guèrra de 39-45, fins als tres volums de son grand roman "europèu", La Festa, sens oblidar tota una tièra de racontes, autobiografics, o de ficcion, que fan d’el lo prosator sens cap de dobte mai divèrs e mai productiu de tota l’escritura en occitan del sègle XX.

Se coneis mens lo poèta : ça que la, son primièr recuèlh, Paraulas al vièlh silenci, publicat en 1946 a las edicions del tot novelari Institut d’estudis occitan, debutava una entrepresa poëtica fòrta e originala, prigondament marcada per lo lirisme dels tempses del subrerealisme e de l’amor fòl. Son grand recuèlh, Dire, en 1956, foguèt un moment màger dins l’istòria de la poësia occitana : la mesa en muscica d’aqueles poèmas, en 2005, per lo cantaire Jan-Mari Carlotti (un CD editat per l’Associacion Montjoia) nos a fach ressovenir coma caliá d’aquel moment unic, e a joslinhat la joinessa d’una escritura que los dos recuèlhs editats per Jorn venon perlongar e renovelar amb plan de buf e de gravetat.

Robèrt LAFONT dins lo nòstre catalog :
La gacha a la cisterna (1998)
Cosmographia monspessulanensis (2000)
Lo Viatge grand de l'Ulisses d'Itaca (2004)
Poèmas 1943-1984 (2011)
The watcher at the cistern (2014)