Frederic Fijac
A quicòm pròche / A peu de choses près
2015. amb una version francesa de l'autor
La poesia pòt èsser una responsa a l'enigma de l'enfança. Frederic Fijac medita
sus la natura d'un present ont subrenadan coma de « bordufalha » los membres
espargits de l'enfant que foguèrem, sensacions persistentas fins a l'obsession o
fugidissas coma lo liuç, que remontan del fons de nòstre temps personal. Sa
poesia investís tres elements, tres luòcs fondadors : lo flume, la bòria pairenala e
lo bòsc. Aquelas sòbras del passat vivent al jorn de uèi son tant de tròces d'una
experiéncia a l'òrle dels mots : « e mai enquèra canturleja per las brumas lo
mainatge en tu ». Son evocadas amb una esmoguda discrèta : esmai
d'adolescent que pren lo riusset per confident, enclausiment pels còdols del riu,
pròpri a totes los Ponhetons, amistat dels arbres, fraisses o calpres, extasi
cosmica que religa l'òme al mond e l'adulte a l'enfant.
Aquela pantaissada ontologica e sensuala s'exprimís dins de menas de versets, unitats de sens cadençadas amb suènh, que lor longor variabla esposa « a quicòm pròche » lo ritme de la pensada, quora folzejanta, sentenciosa o meditativa. Lo títol anóncia proximitat o aproximacion. Lo poèta nos dona la clau d'un univèrs de languison e de reculhiment, que nos liura amb retenguda. Sèm seduches per una emmascanta prigondor de soscadissa, per d'esmogudas esquiçantas de tendrum e de sensacions lumenosas giscladas del passat, tal aquel imne supèrb a la carròta culhida per la memòria dins un òrt perdut : « Al cur d'una carròta, cruscar lo sacrat tot crus, tot sucre. »
A quicòm pròche / À peu de choses près
de Frederic Fijac
amb una version francesa de l'autor
Format : 14 x 22 / 224 paginas / ISBN : 978-2-905213-48-5
Preitz : 18 €