Edicions jorn :: literatura occitana contemporanea

Sergi Bec es saique un dels màgers poètas occitans vius. Nascut en 1933 a Cavalhon, comença fòrça lèu a escriure de poèmas. Vengut jornalista a Marselha, puèi director adjonch del PNR del Leberon, quitarà pas d'escriure de poèmas dins sa lenga d'eleccion, practicant las doas grafias, la mistralenca e la classica, a l'encòp per esperit de conciliacion e per indiferéncia als sistèmas. De nombroses prèmis literaris vendràn consacrar sa reconeissença : prèmi Aubanèl, prèmi Antigòna de la vila de Montpelhièr, prèmi Provença...

En 1954, a 21 ans, intra en poesia amb son primièr recuèlh : Li Graio negro. Sa carrièra poetica se debana donc sus mai de cinquanta ans, termejada de setze recuèlhs al mens, pareguts a cò demantun editor. Tusta per sa fidelitat a una lenga e per son unitat remarcabla, sa coeréncia sens copadura. Dins lo vam del surrealisme, marca una rompedura amb la poesia felibrenca.

Sergi Bec a bastit son univèrs poetic sus tres instàncias : lo ieu del poèta, lo tu de la femna aimada e la tresena persona qu'es lo país. Lo ieu es omnipresent : la poesia de Sergi Bec es lirica. Amb totas las inflexions possiblas d'aquel genre, exprimís los estats d'arma, las sensations, los sentiments del locutor poèta. Aquela paraula s'adreiça gaireben totjorn al meteis destinatari femenin, Anna ; la femna aimada amb passion, la dòmna dels trobadors, la Laura de Petrarca. Sa preséncia envasís l'òbra, es a l'encòp l'objècte de la passion e la confidenta ideala, que recep l'ofèrta de la paraula e que n'es la font. Lo país d'eleccion, objècte el tanben d'un amor passionat, lo Leberon, e, al delà, Provença, son exprimits per la tresena persona, la non-persona. Lo demai del mond es totjorn evocat a partir de l'aicí e ara del país. Poèta, femna e país forman un mena de triada simbiotica.

Aquela poesia prigondament umana celèbra un rapòrt al mond fach de meravilhament e d'amor pels òmes e per las causas naturalas. Son lirisme d'una invencion inagotabla, dels imatges de longa renovelats, exprimís tant la passion per l'aimada coma la revòlta contra l'injustícia.

Sergi Bec dins nòstre catalog :
Òbra poetica 1954-1960 (parucion 2012)