Silvan Chabaud
Serranas
2019 - Amb una revirada francesa de l'autor.
Las quinze novèlas del recuèlh poirián èsser caduna un capítol de roman. Totas racontan un tròç d'istòria, a l'instant d'intensitat dramatica mai grand, marcat pel
destin, quand se jòga l'astrada d'una vida. La màger part son de racontes d'ascension, passatges de còl o viatges iniciatics, que l'autor a posats dins son
experiéncia de marchaire e de montanhòl. Aquò's per exemple l'agonia d'un soldat de l'armada d'Hannibal, que se remembra amb una fiertat malencònia lo
passatge dels Alps. O l'exòdi dels protestants d'Oisans que passan lo còl de la Musèla per fugir las persecucions religiosas de Loís XIV. Aquò's la davalada del
còl d'Ares, pendent la Retirada en genièr 39, d'un drollet endecat que dona la man a un ancian pelut francés vengut l'ajudar, unijambista coma el. O lo
sabotatge per un soldat du comandant Massod d'un pont de l'Hindu-Kouch ont deu passar una colomna de Talibans. A aqueles racontes, la montanha prèsta
son quadre, lo destin son moment e l'Istòria sas diferentas epòcas.
La mitat del libre es escricha en lengadocian, parlar d'adopcion de l'autor, l'autra en provençal, son parlar d'origina, de cada part del raconte central, l'Incendi de Cartalhat, allegoria possibla de totas las catastròfas. La narracion densa porgís una granda diversitat de luòcs e de periòdes, amb totjorn a l'avalida montanhas magicas o sèrras inspiradas, que resumís lo títol Serranas, allusion al crestenc salvatge que bòrda lo Larzac miègjornal, qu'a son pè viu l'autor.
Serranas,
de Silvan Chabaud, amb una revirada francesa de l'autor
Format : 14 x 22,5 / 120 paginas / ISBN : 978-2-905213-52-5
Pretz : 15,00 €
De Silvan Chabaud, las edicions Jorn an ja publicat :
Leis illas infinidas/ Les îles infinies