Adelina Yzac
Un tren per tu tota sola
2002. Amb una version francesa de l'autor
Una pichòta gara de campanha dins la nuèch e la nèbla. Joana, una femna envielhida, pren lo tren. Ven de daissar per la jornada Bon-Abri, l’ostal
ont a passada sa vida, enrodada de qualques pròches que li fan coma una familha. Va a la vila signar un misteriós papafard que devinam que
per el acceptarà de recobrar sos bens o de se’n desfar, sabèm pas tròp. Mas dins aquel tren que sembla rotlar per ela sola, lo passat
torna espelir e lo viatge vira a la cachavièlha, car dins sa consciéncia angoissada, a aquel trenon bonàs se substitua un autre tren, un
carreg de vagons de bestials que prenguèt amb sa maire, pendent la guèrra… Torna veire, torna viure l’absoluda orror dels còsses amolonats,
de la pudesina estofanta, de las maires que pèrdon tota dignitat. Joana retomba en infèrn, arribarà pas a la vila. Quicha son mocador de
drolleta, marcat d’una J. coma Joana... o Judith.
Dins aquel raconte menat d’un sol vam, sens pausas ni paragrafs, de las frasas inacabablas e repetitivas, sincopadas coma la cadéncia d’un tren, Adelina Yzac torna a sa lenga d’enfança. Contaira e poèta de las enfanças saquejadas, aicí encara nos fa sentir lo pes del malur dins una escritura que son ritme entintainant, evocant lo de las ròdas suls ralhs, luènh de tot estetisme, nos dona d’ausir una autentica poësia.
A prepaus de Adelina Yzac | Retorn al catalòg
Un tren per tu tota sola
de Adelina Yzac
Amb una version francesa de l'autor
Format : 14 x 22,5 / 80 paginas
Preitz : 11 €