Joan-Ives Roier
Les temps passats
2006. Amb una version francesa de l'autor
Aquestes 151 sonets trocejan una existéncia coma tant de fenèstras dobèrtas suls « temps passats », dins lo ròdol natal de forcauquier o
endacòm mai : scènas secretas, païsatges esquerrièrs, retraches pintoresques, plasers pichonèls, dramas intims.
Joan-Ives Roier nos conta
sa vida, o puslèu desgruna sos remembres a tròces e bocins pagelats pels 14 vèrses reglementars escandats e rimats amb una rigor classica.
E quand lo nombre ven tròp estequit, engimbra de cicles de sonets per evocar tal episòdi de sa vida. Ne cal plan sièis per escutlar aquel
dinnar memorable e pertocant empassat un jorn de permission del temps de son servici militar dins una improbabla aubèrga de vilatge tenguda
per un coble de vièlhs, e dotze per contar sa primièra afectacion de regent al vilard-bas d'alòs dins un ostal trevat.
A son mèstre Belaud de la Belaudièra que n'es tot embegut, Joan-Ives Roier a manlevat, en mai del títol enversat e del nombre de sonets de son darrièr recuèlh, la fantasiá barròca, la metafòra desvarianta e concreta, una paraula poëtica a l'encòp espontanèa, potenta e mestrejada, lo gost dels plasers de la taula e del lièch, un erotisme sanitós e crus. Aquestes « temps passats » son 151 plats gostoses, nadant dins l'òli, servits per un poèta mèstre cosinièr dins una lenga provençala naturala e druda.
Legir un troç | A prepaus de Joan-Ives Roier | Retorn al catalòg
Les temps passats
de Joan-Ives Roier
Amb una version francesa de l'autor
Format : 14 x 22,5 / 160 paginas / ISBN : 2-905213-30-2
Preitz : 18 €