Estève Salendres
Camin descaminat
2010. Poëmas occitans amb una version francesa de Joan-Frederic Brun
Estève Salendres es un poèta occitan de la novèla generacion. Aquela lenga qu'aprenguèt de drollet
dins son vilatge cevenòl de Sant Marcial,
el l'a madurada, aprigondida e meditada per ne far non pas sonque una aisina d'expression poëtica que pòsca dire la vida vidanta dins çò
qu'a de mai umil e doncas de mai uman, mas tanben una companha enveirenta e la part mai secreta de se. Aquela lenga de l'intim, pasmens
perfièchament normada, li permet d'agandir lo còr de las causas que batega dins l'instant.
L'escritura es despolhada, lo ton sens illusion, los poèmas brèus, mas la votz a de buf : « Pastre sens tropèl / Perdut dins l’immensitat de las causas / Òme sensa fe / Poèta sensa mot / A caminar aquí paurós / Atalentat de vida e d’espèrs / Òme urós d’èstre viu / Assetat sus la paret dels jorns / Cercaire de vertat / Escanaire de vertut... » Aital esbòça dins lo poèma liminar un autoretrach universal. Sem unics e intercambiables, tragics e derisòris, condemnats a l'espèr pels enfants que fasèm.
Al fil dels mots, long d'aquel camin descaminat, rescontram « Las frontièras / Sensa baranhada / D’un país oblidat / Lo buf delanhat / D’una votz sensa resson / Pichòt tròç de temps escanat. » Lo camin se descamina per nos endintrar dins un país d'enfança ont se rebat e s'encanta nòstra realitat despietadosa.
A prepaus de Estève Salendres | Retorn al catalòg
Camin descaminat
de Estève Salendres
amb una version francesa de Joan-Frederic Brun
Format : 14 x 22,5 / 48 paginas / ISBN : 978-2-905213-38-9
Preitz : 11 €