Pèire Bèc
Liturgia pagana
2009. Poemas occitans. Amb una version francesa de l'autor
Liturgia pagana prepausa una seissantena de poèmas de formas e de tèmas variats, mas familiars al poèta. Las doas primièras parts atanhon
a l'exercici poëtic, que fòrabandís pas l'inspiracion, mas l'estructura e la desliura per las constrenchas formalas. Los Dotze sonets
tà l'annada ressortisson al tèma del zodiac o de las « sasons de l'an », tant espandit dins la poësia universala, entre autras occitana,
depuis Claudi Peiròt al sègle XVIIIen fins a Max-Philippe Delavouët al XXen. Los meses de l'annada e la forma del sonet permeton
l'expression calibrada d'un lirisme personal fach de remembres e de languison, sentiment que senhoreja dins aquesta liturgia pagana.
Faulas e cançons agradoças, coma o marca lor títol, concílian « formas simplas » oralas coma lo conte, la fatrasia o la formuleta,
tròbas originalas e mestritge de l'erudit, que res d'aquela tradicion li es pas estrangièr. Lo ton es trufandièr e tendre,
cracinant e melodiós a l'encòp, coma una cançon de carrièra.
La tresena part, mai importanta, Litanias deu silenci, prepausa de poèmas de forma mai liura, d'inspiracion mai espontanèa, mas
totjorn plaçats jol signe de la liturgia profana, coma se, al poèta, li fasiá mestièr de s'inscriure dins un ofici religiós « profanat »
que li serviguèsse d'encastre e donèsse a las destinadas que n'evòca de tròces (la sieuna bèla primièra), si que non un sens sacrat o
una dimension trascendenta, al mens una mena de ton tragic e seren. Lo poèma es coma una pregària sens cap de Dieu que lo temps, sens
cap de mistica que lo remembre, sens cap de fervor qu'una languison de còps que i a lancejanta. Als mots profans, lo poèta mescla de longa
de motius crestians, la mater dolorosa, l'anhèl mistic, « los bròcs d'ua coroa cristica ».
Aquelas litanias del silenci se debanan tot còp en poèmas mai longs, en « pichòtas òdas », coma d'imnes a la creacion, com d'accions de
gràcia escampadas cap a un cèl vuèg, tales aqueles « Caminaus », celebracion d'un espaci vengut mai vast per la quita abséncia de Dieu.
Pèire Bèc arriba aital a conciliar, mercés a son mestritge formal, una cultura immensa e lo sentiment borrolant del passatge del temps, un tèma que li es familiar despuèi son primièr recuèlh Au briu de l'estona.
A prepaus de Pèire Bèc | Retorn al catalòg
Liturgia pagana / Liturgie païenne
de Pèire Bèc
Amb una version francesa de l'autor
Format : 14 x 22,5 / 184 paginas / ISBN : 978-2-905213-37-2
Preitz : 18 €