Joan-Frederic Brun
Flors d'errança
Noveltat 2017
Poemas occitans, amb versions francesa e anglesa
Aquestas « flors d'errança » son estadas culhidas per l'autor dins sas
escorregudas al còr d'espacis pantaissats mas de bon reconéisser, qu'el trèva e
que lo trèvan despuèi totjorn : la garriga e sas montanhas dins lor resplendor
solara, mai que mai la montanha sacrada del poèta, la Serrana jamai nommada
aicí, mas que servís de decòr a mantuna novèla sieuna. Aqueles territòris son
poblats de sòmis e de fadas, e las montanhas mençonadas son las crestas
secas e peirosas que tresplomban las vals de Vis e de Buèjas tan plan coma
son lo paroxisme del desir o de la gaudença. Rèirepaís e inconscient se
confondon. Aital coma se pòt pas agandir aquelas cimas sens se far cremar pel
solelh e esquiçar per la barta davant de cabussar dins lo cèl o lo vuèg, aital lo
desir nos escampa dins una dolor deliciosa e nos mena a nòstra pèrda,
l'anientament dins « la reflambor del temps fugidís », « ont lo nonrés se càmbia
en crida ». Joan-Frederic Brun, dins la linha de son recuèlh precedent, çai se fa
lo poèta d'un país real e somiat, un reialme femenin, bleuge de secaresa
luminosa, ont somiam de nos dissòlvre, cedissent à la temptacion de l'abís, a las
delícias del vertige e als cants de las serenas.
« Au clar país de las sets qu'estorrisson espacejas la suaudor de ton oblit... » Aquestas 58 flors son seguidas de tres retraches corts de poètas, l'Albanés Ali Podrijma, la Curda Berivan Dosky e l'Occitan Ives Roqueta, qu'encarnan cadun a son biais l'astrada tragica de son pòble.
Flors d'errança
Fleurs d'errance
Wandering Flowers
de Joan-Frederic Brun
Amb versions francesa e anglesa
Format : 14 x 22,5
Preitz : 12 €